Chungkuh: Thih Hnu Thlacam Piaknak Tuah Hi …?

Thih Hnu Thlacam Piaknak Tuah Hi …?

Nikhat ah, ka pu nih ka hawi le inn ah ka zulta a ka ti i, ka kal huam lo. Nain a bia el ngam lo khin

" khoika ah ka pu "

" ka hawipa, a thihnak kum hnih tlinnak a fa le nih an tuah piak i cu ka lei cu " a ka ti caah, kal lo awk ah le a tha lo. Kal ko ning ka ti i ka tim.

Ka rak ra thluahmah ko i, ka pu nih cun bia a ka hal

" ka fa, nangta zeitin dah na ruah hi thihnak kum hnih tlinnak e, zei e timi pawl hi a tha na ti maw ?" tiin. Zei ruangah dah a kal hal hnga ka ti i, zei hei ruat theng lo khin

" A tha ko ka ti, ka pu. Fa le nih pa le philh lo nak caah an tuah mi pei a si ko cu, cun an si khawh caah pei an tuah mi a si ko cu, a tha tuk ko ka ti " tiin ka hei leh i ka kal thluahmah ko. Nain ka pu nih cun,

" Nang cu a tha ko na ti ko ti, nain kei cu ka pom ning a si lo "

" Ziah ka pu, zei ruangah ?"

" Zei ruangah ti ahcun, na fian nak dingah a tu kan kal nak ding hi, bia chia deuh in chim ko ahcun a fa le nih zeihmanh ah an rel lo mi a si. A fa le nih, zei hmanh ah an rel lomi a ruang cu a nupi a thih hnu ah nupi dang a thit caah a fa le nih, a dam lo si zongah an rak zoh duh lo mi a si. Nain a mah cu fa le cungah dawtnak a ngei tuk i a ngeih mi poah kha, Bank ah a fa le min in phaisa a khumh piak hna. Cu lawngah ka pa hi a kan dawt tuk ko hi ta an ti i an tuah piak mi a si. "

" aw a si tak, a fa le cu a dawt taktak hna ti cu a lang ti. A dang cu si hna sehlaw a ka daw lo mi fa le tham cu tiin an hei hlawt ko hna lai cu ti, ka pu "

" Cu tiin cun a si lo ka fa, nu le pa nih fa le cungah dawtnak an ngeih mi cu vawlei nih a chuahpi mi a si, khamh khawh mi a si lo. Nain fa le nih nu le pa upat, cawmken le dawtnak an ngeih hi cu vawlei nih a chuahpi mi a si lo. Cu bantuk cu thinlung tha taktak a ngei mi lawng nih an ngeih khawh mi a si "

Ka pu bia cu, suallam a ngei taktak tiin ka ruah pah khin

" Sicun ka pu, zeiruangah dah mah thlacaam nak tuah na pom lo ning cu zeitin dah si ?"

" Hei ruat ve ko law ka fa, Nu le pa thih hnu in hitin an tuah le cu a tha maw tha lo cu keimah nak hmanh in a thei deuh ding dahkaw na si cu, nan nih cu fimthiamnak chan ah a chuak mi nan si. Nain na hei pom ve ko i ti, nangmah ruahnak cu na palh kan ti kho ve lo. A mah belte keimah ruahnak cu hei ngai chunh ve hnik "

" Aw.."

" Hi tin ta ka fa, nu le pa thih hnu in phaisa singhra (10 ) leng dih in an hei tuah len nakin mu, nu le pa an nun lio ah an duh mi te ei ter, cun an duh mi hna cawk piak in an i nuam mi kha a tha deuh lo ma ? ".

" si ve ko, nain ka pu…. Nu le pa caah tiin thlacaam piak nak an tuah mi cu a tha ve ko lo ma ? "

" A tha lo ti cu ka ti lo ka fa, ka chim duh mi cu nu le pa an thih hlan ah nuamh tein an chiah ding kha ka ti duh mi a si. A tu hi cu, nu le pa thih hnu in thlacaam nak an tuah i fa le nih ka rian a dih cang ti phun khin an um. Nain nu le pa thih hnu in mah an tuah mi tham hi cu zei san hmanh a tlai lai lo. Nu le pa thih hnu in, mah fa bangin a kan zoh lomi pawl paw khim tein rawl hei dangh len khi suallam a ngei lo tiin ka ruah ka fa, biatak tein chim ko ahcun ka fa, an mah nunnak he thap in a kan dawtu nu le pa hi cawm deuh ding dahkaw a si cu " ka pu bia cu, ka von ruah deuhdeuh ah a hman ko rua ka ti.

Nu le pa nun lio ah hei dawt ttung loin nu le pa thih hnu ah mitthli he zei he aa ciah len mi fa le ka hmuh mi hna khi an tlawm ti lo. Cun ka ti khawh tawk in lenhloi ka ttial mi " Lawmhnak Mitthli Dorkhat " timi zongah khan nu le pa nun lio ah dawt ttung loin thih hnu lawngah " ka nu aw,, ka pa aw " tiin a tap mi hi zeizah dik an si hnga?

Cun, ka pu nih a chim mi bia pakhat cu chim ta rih ko ning

" Ka fa, fa le nih cun nu le pa an thih ahcun vawlei ah an phum hna, mei ah an rawh hna. Nain nu le pa hlan ah fa le an thih sual si ahcun kan nih nu le pa nih cun vawlei ah kan phum hna lo. Hi ka ttang chung thinlung ah hin dahkaw kan phum hna cu ka fa " tiin.

Ka pu bia cu, ka ruah i a thuk tuk tiin ka ruah. Cu caah, tu ca a rel mi nangtah zeitin in dah na ruah ve ning a si ?

Notes; kan khua thlacaam nak tuah lio kan khua upa pakhat he kan i ruahmi bia kha, kei mah ruahnak he ka von fonh chih mi a si.

· Zangfah tein ruahnak cheuh ka philh hrim hlah mu. A tanglei Email ah khan ruahnak cheuh khawh peng ka si. Ruahnak na ka cheuh mi kha ka caah cun chan khat chung ka chim ve ding dahkaw a si cu. %

Lunglawmhnak he,

Salai Van Bawi Mang ( Chungkuh )

Email – avanforsmile@gmail.com.

Web- www.chungkuh.blogspot.com

Online chungin na rel zuam lo sicun PDF file download tuah khawh a si.