EK Tuanbia

            

            EkTuanbia

Hlanliopi ah khuapakhat ah siangpahrangpakhat a um ti a si. Cu siangpahrangpa cu fapa pakhat hmanh ngei loin fanu pakhatte lawng a ngei. Afanu cu kum 18 tling cang kaw va ngeih a cu cang. Cu caah ka fanu caah tiin a ram chungummi vialte sinah ka fanu caah a hopaoh, mirum le misifak thleidan loin co khawh a silai. Cu ahcun, Ek a thawtnamnak kong a chimkho mi nih ka fanu cu nan co laitiin a mi hna sinah a thanhhna.    

            Cu tikah a ram chungummi vialte tlangval pawl anrak i thawh dih cang. Aho nih dah siangpahrang fanu cu a co lai tiin ruahchanhnak he an rak ra ciohna. Cutik ah, siangpahrang pumpak nih biahalnak tuah dingin a si caah an certual ahcun siangpahrang hmai ahcun an rak dirdih hna. Cun, pakhat hnu pakhat in bia halhram cu avun thok hna.

Siangpahrangpa –     Tlangval, nang vun chim hmasat tuah! Ek a thawtnamnak cu zeitindah si?

Pakhatnak pa -                      Ka bawipa, Ek cu a thormi a si.

Siangpahrangpa-      Mah cu, zeitindah na theihning a si tlangval, hun ka chimtuah!

Pakhatnakpa-                        Asi ka bawipa, Ka ei taktak ruangah katheihmi a si bawipa.

Siangpahrangpa-      Aw.., sihrim! Sicun a  pahnihnak pa .

Siangpahrangpa -     Zeitin tlangval, nangte ek cu zei bantukin dah a thawtnamnak a si?

Pahnihnakpa-                        Ka bawipa, Ek cu a thlum.

Siangpahrangpa-      Mah cu, a pakhatnak pa nih khan a thor a ti ttung?

Pahnihnak pa-                       Asi ka bawipa, Ka hmaip akha cu ei lo zong a um kho men. Kei cu ka ei taktak ruangah a si.

Siangpahrangpa-      Aw sitak.Ticun a dang pawl cu ek cu a kha, a thlum hrikhrak, a thor pah thlumpah tiphuncun an chim cio. Cun siangpahrangpa nih a ram chungummi tlangval vialte cu biahalnak cu a vun tuah thluahmah hna i thlahnih renglo a rau. Hi hna a hal ciami hna nih hin cun ka fanu co dingah an i tlak lo, mah ek an einak anka in cun kafanu cu an hei hnamhthlulh lai tiin an ruah ahkhin a lung rawh hi a mak. Cu ahcun, a donghnak bikah patthiate, mi derthawmte tlangval no tepakhat a tang i siangpahrang pa cu a ba ngai cang.

Siangpahrangpa-      Tlangval, nanghi a donghnak na si i ek cu maw na va ei zeitin? A thawtnamnak cu hun ka chimtuah!

Adonghnak pa-         Asi ka bawipa, Ek cu ei hau loin a thawtnamnak cu theih khawh a si. Ek a thawtnamnak cu a phunphun in a um ?

Siangpahrangpa-      Mah cu zei tindah si, a dang cu a thor e, a thlum e, a kha e ti na pei an si cu. Nang cu na dang ngai ttung ?Mah cu a ruang hun ka chimtuah!

Adonghnak pa-         Ahman ka bawipa! Ek cu eihau loin theihkhawh a si. Carel in le khua tuaktan in cun theihkhawh a si ka bawipa.

Siangpahrangpa-      Aw…..sicun, Hun ka chimtuah! Tiin lungsau thinfual loin le theihhngalh duh in cun a vun hal zok.

Adonghnakpa-                      Kabawipa, hun tuak chunve law, Thopaw(fly) pawl khi zoh ahcun theihkhawh a si ko. Thopaw pawl khi hai( mango ) a hminmi pawl hi an duh ngai, cun a pawngkam ah an i zellen ko. Cun thopaw pawl cu, ek a tharmi ahcun an ifu ton.Cu caahthopaw pawl umtu ningzoh in ek a tharmi thawtnak cu thlumpah thurpah in a cawhti cu fiangkhun in theih a si.Cun ek cu a car ahcun a kha cang ka bawipa.

Siangpahrangpa -     Aw… Sicun a carmi thawtnamnak a ruang cu hun ka chimrih tuah!  ( Hifa hi mi sawhsawh a si lo tiin ruahnak he cun a hei zohchih pah!)

Adonghnak pa-         Aw si  ka bawipa, Ek cu a car cang hnu cun tho pawl nih an tlanh duh ti lo ka bawipa. A car cang hnucun a dang rungrul, a khami a duhmi hna nih an tlanh i an ei. Cu caah ek cu a car cang hnucun a kha timi cu tho pawl umtu ningzoh in theihkhawh a si ko ka bawipa.

Siangpahrang a lungtling tuk cang. Cu caah, cu pa cu a fanu cotu le a ram uktu ding ahcun riankhinh a si/Ticun a dong!

           

Hi tuanbia rel tikah ruahawk tete a um. Cucu nang zeitindah na ruah ve ?

            Ek a eimi tlangval vialte hi zeiruangah dah ek hi an ei hnga? A ruang cu ca an rel lo le khua an tuaktan lo ruangah le siangpahrang fanu co duhnak an hakauh Sruangah a siti cu a fiang. Ruah ahhin nihchuak ngai an si ko nain, khuafak deuhin vunruah kan hau. Ca an rel lo ruangah ek an ei cu sikaw, kannih laimi ta zeitindah kan si? Ca kan rel ve maw? Khuafak kan tuaktan vemaw ? Cu caah, ca kanrel lo le khuafak kan tuaktan lo ahcun kawl ek dahkaw kan ei lengmang lai hi.

            Ka bia vun sau rih ko sehlaw, Laimi cu mi upatzia le mihmai ah umtu nunzia( i titer lei ) kan thiam ngai cuh. Kan khua luhlai hna ahcun kawlca in “ Zohchunh awktlak khua “ tiin kan hei i tar. Nain, kan khuachung kan lungput cu chimrih loin kan lam le kan innpawngkam a thur khawh ningzoh ahhin zohchunh awktlak khua he cun kan i tlak taktak maw ? ( Ruah ngai ding thil pakhat a si )                                               

            Cun, Tu ahhin cunkan ram a thleng thluahmah cang tiin mipi nih cun vun aupi cu sikaw, Khua khat ahhin“ Library “ pakhat cu ngei dih a si( Khua tam-u ). Nain, cu kan library hna cu a hngilhmi lawngte an si. Mah hi kan ruah ding a si cang. A hlan kan pipu chan ahcun ca tampi rakrel kho hna hlah hmanhsehlaw atu kanmah chan ahhin cun relcawk lo ca dahkaw kan ngeicang. ( Miphun dang cauk he ti bia ) Mino hna le hngakchia hna rel dingmi cauk pawl hi kan library a min khi a hmaikhap loin ca an rel lo hmanh ah hei chiah sawhsawh ding dahkaw a si. Library inn kan sakmi hi kawl saya/mahte umnak caah maw kan sak lai, ruahcaan kan cu cang laimi? Vun chimrih ko ning! “ Ca kan rel lo ahcun kawl pawl an ek hi dahkaw kan ei lai hi laimi “

            Cun hun chim rih ko ninglaw ( Hun ka theithiam uhlaw )Laimi hi kanLaica kan daw maw ? Aho nih dah ka dawtbak tiin a kut a thlir ngam lai, nangmah maw keimah dah ?Laimi hi minung kan tlawmti lo. A minung hi a ting renglo kanphan cang. Nain hi tluk minung kan tam konain cauk 500 ukhmanh a zuar kho lomi laimi kan si. Hi tluk laimi kan tam ahhin Journal a tlap 3000 hmanh a zuar kho lo mi kan si. Laimi hi cauk tampi  in chuah kan hau. Kan lai hngakchia paohnih bia an chimthiam le cangka in kan laica hi an relkhawh dingmi cauktampi ttial kan hau. An lungfian khawhnak dingmi hngakchia relawk tibantuk in cauk a phunphun chuah kan hau. Cun muittawn cauk zong tampi chuah a herhmi laimi phun kan si. Laimi hi ca tampi kan rel khawhve nak hnga kan laicauk hi tampi kanchuah a hau.

            Adonghnak ah SalaiCeu Bik Thawngnih a rak ttialmi ah ka uar taktakmi he, hi ka ca hi donghterka duh. “ Yangon ummi lai mino cheukhat  cu Aa.. Kawlpa ah pei kan rel ko cu vun ti hna ahcun an i lunghmuih ngai“ tiin a timi hi kan lai mino cheukhat nih kan ruahbak ding bia pakhat asi timi ruahnak he...

            Salai Van BawiMang( chungkuh)

            Chungkuh2@gmail.com

09252460717

Notes; Ka thiamhlei ruangah le ka fimhlei ruangah ka ttialmi a si lo. Siaherhnak lungput he ka ttialmi a si. Ka lawm.