Buti Dawr Ah Minute

Buti Dawr Ah Minute

Kalay khuachung nikhua a linh lak i rawlttam tihal a har ning hi a celh in celh a si lo. Cu ah, phaisa vun ngeih pah lo ahcun mah le mah hrim hi hmaikhah ding phun in kan um lo. Nikhat cu, sianginn chunchuah ttin leiah kan pawttam tuk caah hawile he ~aungzalat buti dawr lei buti ei ah kan kal.

            Kan hun ei khim deng ah, hawile he i capo saih nihpah khin a hung lutmi nungak pathum kan pawng cabuai ah an rak tthu. A thli tein ka hun bih bak hna ah "Aizaw! Maw Pathian.. cutluk mitpum tthiptthep, a biangsum a rem ning le a mittial dawh cu dah!" Cu hlei ah, a hun ka mirh rih hoi. Vun mirh tthan awk thazang ka ngei bak lo. Ka lung a ka suk dan a rang khun. “ Duk..Duk” tiin, ka celh ruam lo cu mirh cu dah! Ka thinlung le ka thihri tiang sivai nih a momh bang khin. " Angun.. nang zei na cah lai ?" tiah a hawile nih an hun hal tikah, Kha ni in ka theihmi cu a min ah “ Angun” ti a si.

            Voikhat hmuhton a si ko nain ka thinlung cahmai ah tamtuk in hmunhma a rak lak. Amah hmuh lai lawngte ka ngeih ko cang. Thaizing zeitik ahdah asi lai ti lawngte ka bawh i zaan ah hin ka zaanmang uktu a si cang. Ka thisa le mithlam ah a muisam cu hrawh khawh lo dingin a cuang cang. Kalay nilinh lio caan i 9miles lei ah cycle vun i cit a nuamh khawh zia, cu lio caan ah zilthli nem he a rak choimi Angun, a mirh zia thlum ning kei vaalpa ngang lakin a hun tuah ko. Khoi maw daihnak….Angun a mirh sinah daihnak a um. Ka vun mirh nain theihter loin hnulei mer in mi a zoh ziar hna. Aw a fah zia hi mu! Ka mithmuh hmaika bakin a liam zaumau ko. " Khi… doi hna, kan hmai i a kalmi cycle khi " tiah ka hawipa ka vun ti cu ka pum le kattaza lam he a hun i peih cang. Ka lung a hun mit. A ruang cu ka hawipa zaktang ah ka hun tongh sual caah a thlingzah celh loin kan tluk sual kha a si. Nain, vanchiat ah vantthat maw  a si thei hlah. Ka mit ka vun i au ahkhin, Angun kan pawngah a dir kha ka hmuh. Ka khongdennak le ningzahnak a zeite hmanh ka thei ruam lo. Vuk ka tho i ka vun dir cu"Pa pi hna nih, hi bantuk ah cycle tluk cu…" tiah a zai pah in a hawile he ka hmaika in an liam thluahmah ko. Sianginn ttin caan a si caah, a ho mizei paoh nih zoh kan tong ngai. Ni dang ah cun a kan zoh duh lomi nungak dawh dawh hna zong nih tuni cu an mitpum ah zangfahnak he zoh kan cuang ngai. Nain ningzahnak he kan hmai chiahnak kan theih lo hi cu..tuar zia thiam ding khi a si lo. Cucu zei ruangah dah si hnga? 

           

            Kalay cu a lin tiah kan ti ko nain January thla hna ahcun a kih ning hi mi ing a puanter. Hakha le Thantlang lei in a rami kan caah cun Kalay khua cu a lin tuk i tiah, angki leng phurh loin kan um caah kan cei diam ko. Zinglei nazi 8:— am hrawng asi lai. Sianginn kainak lei kan hun panh i datsi dawr kan hun phak ah, India cycle sakuti  he Angun. Angki leng a engmi le jean bongbi van muici (blue ) he a dawh khawh ning, kei ka khuasik saisem hna an lau dih. Amah ka hmuh cun a kik tukmi zing zongah lumnak he ka khat. Nain Kan hun phak bakah dawr in a chuah si cang. Lam hlat in ka kut ka vun thlir hnawh cu " Tlangval na thiam…" ti hrawng mirh khin a ka mirh ko. Nain ka caah cun a man tahchuh awk ttha a lomi a rak si. Ka hmaipanh ngai. Ka kut hna hi dai tein an um thiam lo tunai kha hehe…hehe…. tiphun khin ka lungchung ah nuamhnak he a khat, “ Haa!! Tuabi.." tiah datsi rawngtu pa nih a vun au cang ko. Ka vun zoh cu datsi cu cycle chung rawn hlan ah a tle dih cang. Mah hmanh dawh lo ngeih chun iangte chuah in ka hun mirh nain keimah nih ka khonmi a si caah ti awk ttha loin nikhat ah phaisa 1000ks buti einak ding cu datsi man ah ka liam cang. Cucu zei ruangah dah a si kun hitin ka um hi?

           

            Caan hna an liam tuanh ning hi theih hmanh ding a si lo. Ka duh tiah Angun hi ka hawile sin dah ti lo cun midang hmanh ah ka chim phuan hlan ah hawi nih an i ngaih takmi February 14 (Valentine Days) cu a hun phan ko. Hini ahhin, thizil hran dan le nikhua umtu ning a dang. Mi thinlung kip ah hakkauhnak le duhfah hawi hngar in kan um. Kei le bang cu nikhat chung chunmang manh in le zu nih ka thinlung cu mithlam chungin Angun cu len a ka sawm i cutin mithlam ah ka duhmi Angun he zaanlei 2:00 Pm tiang kan lengtti. Cu lio caan ah, ka lungah duk tiah a hun chuakmi cu tuni ah Angun laksawng pe ve ning timi a si. Ka thinlung le ka minung sining in cun ka ngamh bak lo nain duhnak thinlung tak he laksawng pek ka tim. Ka hawile pathum he laksawng cawkah kan kal. Cu lio ah, Angun te cu kan i tong ko hna. Maw Pathian a tthat ning cu dah! Zeidah laksawng ka pek hnga tiah ka ruah lingcing ah a cycle tawh ah a thlaih tti dingmi( tawhttwe) a um lo kha ka hmuh. Cu le cangka in ka cawk cawlh i a cycle cu  hawl hram ka thok. An department hmai hrawng ka hun kawl dih cang. Nilinh lak i tha bat khi celh ruam ding a si lo nain duhmi ca ah cun tiah tha kai pe. A cycle cu ka hun hmuh cang. Ka thinlung ah hnangamnak le daihnak an rung ttum. Cycle tawh thlaih te cu ka hun chiah piak i " I Love You" tiin a ttialmi asi caah a hmuh lai ka ngaih khun. Cun, a lak ka hmuh tikah phone chonh in ka duhnak cu ka chim phuan lai tiah ruahchannak nganpi he chunmang ka manh. A lak lai cu hngak in a phennak lei in ka hun bih. Kan hngak.

            An major pawl ttin an hun panh thluahmah ah khin Angun zong cu hmai a hun hnor thluahmah ve. An major Zoology department lei in ka sin a hun panhmi khi a lo. Nain thlanglei sang a panh thluahmah ai! Celh ruam lo a si lo, hi duhnak ngai hi dah! Ka lungtur dan a rang thluahmah cun, ka thlan hripi hi tiva hme tete pawlnak cun a lian deuh kho men ti hmanh in tahchun awktlak bak a si. Nain mu, ka ruah ning bantuk in thil a hung si lo. Ka ngaihchiat hi mi hmai ah ttah bak khi ka lung ah a chuak ko. A ruang cu.. cycle tawhtlaih ka chiahnak kha, kawl nu tthia nawnte a cycle a si rak ai. " Aaa…mah pa ngai cu dah! A hruh ning hi duh ko ahcun minung pumpak in pek ding" tiah zai hnawh ka tong hoi.  Cucu ho ruang hen si hnga? Ticun, kei hawi Valentine ni ah kei cu " Midang ni " ah rak hman in kekkuainak he tintling cungah lilen nun king in Angun zuun ka tlem.( Nungak tlangval caah Valentine ni kan rak hman ning).

            Caan hna an liam a ran ning hi, ka dopmi hmuh khawh lo thil bang. Pathian nih semsahrih bang buti dawr ah cun, nifatin kan i tong. Cun, ka mit-au umtu zia zoh in zangfahnak he hawikom ah caan ttha a hun ka pek. Nain, ka timh tuah ning bangin a sinah duhnak bia cu ka phuang chuak ngam hrim lo. A pawng ah a hun ka tthut ter caan, phone ah vedio kan zoh tti caan hna i ruah lo piin ka sin lei a vun hoih ah hin cu"Maw ka thin, ttek tlak bangin..ka khuasik saisem zong an pot dih". Cu lak ah cun, " Zeidah…?" tiah lungthiang tein le mirh pah a hmubo pah in a hun ka ti rih. Ka thisa le ka nunnak nih hin a aw nem sinah thlim an rak duh tuk ko.

            Caan cu a hun kal ziahmah ko. Cu bangin sianginn kan kai mi First semester zong an dih i Angun he kan kar ah tthennak thilzil a hun hrang ai. Amah caah cun a zei si hmanh a thak lai lo nain ka caah cun ka nun ka sining ah pakhat a bau cang. Ka nun sia a rem ti lo. Laitlang lei tlun lai ka hngahhlang mi cu a ttih in ka ttih cang. A ziah, kan duh tiah ka rak phuan hnga lo mu. Hi chitkhat kan i hlat caan hna ah hin maw val dang sinah liam sual lai tiah ka phang. "Maw caan… rangpi kal tthan zok ko. A hlan i na tlik bang khan" ti awk zong nih a ttha lo. Maw lungfah tuarzia a har hi mu.

           

            Sianginn khar chung i ka lilennak le ka ngaihnak hna cu ka diary ah a khat. Ticun, second semester cu kan hun phan tthan. June thla a si bantuk in thinghnah hring didel in Lairam lei vun cuanh ahcun li a leng khun. Maw Lairam kan ngaih hi dah! Nain zeiti awk ttha hrim lo. Tu lio caan hna ah cun Leikuang i natum he lei va thuan le zaanlei rawl ei ah a um lo chunte ngapih he rawl kan rak dumtti hna kha ka ngai. Kiangkap ka vun zoh ah kawl pawl lei a thuangmi hna ka hun hmuh hna ahkhin cun Lairam le kan khua nule pa hna ka ngai hna. Nain, ngaihnak nih zeihmanh a chuahpi tuk lai lo dah. dah.“ Zei na cah lai?” tiah dawr hngaktu nih a vun ka hal cu, ka ruahnak hna an hun lau dih. “ Aw aw… Sabuti khengkhat in, cun sapherh zong mu”.

            Hi zawn ahhin…, Angun kha ka rak hmuh hmasa i amah ruangah ningzahnak ka tonmi tete hna le hmaisen thintur in ka tuarnak hmun. Aw…tu hi, Angun te zong sianginn kai a hun phan cang lai. Nain tu hi kan i hmu rih lo. Hmuh ka duh ning cu nain a ka philh cang hnga ma tiah lungkil thinphannak he ka dai tthan. “ Hey Ella si lo ma, zeitik na phak?" tiah ka hawile pahnih nih a vun ka fuh ko ai. Ka nuamh ning, hawi le kom hi cu mu tthen caan le ton caan hna ah hin tuarzia thiam ding khi a si lo mu. Lei cungah hin a fekmi dawtnak lakah hawikom dawtnak hi a tel ve lai dah.

            Bia sau ngai ka vun i ruah hna! Angun kong hna ka vun hal hna. Annih zong kan hmu bal lo e tiah an vun ka chim.  Zei ruang dah si hnga tiah lungretheih in ka buti ei zong a thaw ti lo. Cun, sianginn lei cu ka hun panh thluahmah khin sianginn luhnak lai i Kalay University timi ka vun hmuh khin ka vun i thei. Aw..! final year bei ka phak cang hi timi ka hun theih cu thinphan ther le ngang in ka um ai. Sianginn chunglei ka hun luh ahkhin… kumkhatnak ka rak kai lio i nungak pawl cycle cungin kan rak hauh tonnak hmun tete, Ballung chuihnak certual lei ka vun zuan. Hi hmun ah, Major League ballung chuih lio i mah le major cio in rak ttanh, rak au lio caan hna kha tukum in cun ka kal tak cang lai timi ruahnak he lungzur tha der in khan chunglei ka hun panh. " Nan i thei ko si lo maw? Mah sianginn nan dih in zeidah ram le miphun caah nan ttuan lai timi zong nan i ruat cia ko lo maw? Kei cu pakhat tein cah kan duh ko hna, hi nan degree hi maw zomhteih lai u cih. A dang cu, Kalay University degree tham cu tiah anti. Nain mah kha cu anmah cungah a ngeihmi a si i nan nih cu kan zumh ko hna. Nan degree hi hmanzia thiam in nan upat lai ti cu" tiah kan Chemistry Profesor nih a vun kan chimmi nih khin ka lungfah a zual. Cun, ka thin a phang. Tukum ahhin ruah lo piin sung ninglaw tiah….?

            Ni dang ah cun Canteen lei kal ka huam lo nain tuni cu kal ko tuah ning ti ruahnak he ka vun panh thluahmah. Lai sianghngakchia a dang zong sianginn kai a thawhmi hna ka vun hmuh pah hna a cheu nih a kan theih lo nain ka hun mirh hna i lak-lawh in a ummi hna an um. A cheu cu mah le i uahnak lungthin a ngei bang khin an tam. Canteen ka vun phan cu, Laimi an tam rak ngaite. Anmah nih cun an ka thei lo nain a mui ka cin ngai ko hna. A cheu cu kawl nih a kan nihsawh sual lai ti maw an phan maw dek, kawl holh in a holhmi an tam ngai. Cu lio ah cun, ka lungah a hung pemmi cu Lai Sianghleirun Sianghngakchia Bu (LSSB) nih Lai Cazaul ah an rak telh tawnmi" Na Miphun Na Zahpi Ahcun Na Miphun Nih An Zahpi Caan A Phan Ve Te Lai" timi a hun chuak i ka lung sia an herh ngai.

            Ka vun i chok len i kawl dawr 528 ah keimah lawngin a kikam leiah a lawngmi tthutnak ah ka tthu. Hlaphak hraikhat ka cah i sianginn kai caan ah duhmi ngeimi leng le val rual hna ka zoh hna ah khin ka lungah zeitin dik a um? Hnahchuahnak maw theih hlah, lungretheihnak dik? Kawl pawl a cheu cu a thli tein mi hmai ah aa hnamh hna an um nain Laimi an um ve hnga maw tiah thather ngai in ka vun kilkamh cu an rak um hraw lo i ka tha a dam ngai. Ka tthut caan a sau pah cang. Chungkhar lei in phaisa an ka kuat khawh rih lo( thla dih rih lo) caah phaisa ka semrel ngai ruangah a si men lai dah dawr ngeitu pawl an mit ka kem ngai. Cu lio ah, ruah lo piin Olivia a rak phan ko. Olivia hi mui dawh iang ngei, holh tam ngaimi a si. Muidawh cu an holh a tlawm an timi kha a rak si lo. A holh tam hi ngate thawchuah bang a hmur hi a din ci a si lo.

“ HEY! Ella, ei khei...! na dawh lo ning cu” A! cu ngai mi ti fah cu dah. Hawi dang cu dawh lo tal hmanh ah na dawh ning cu kan i ti, a molh ko lai dah.

" Aw ee,, nang zong na dawh ."

" A za. A za! Ka dawh cu ka theih ko cu hehe fak ka hau lo " tiah na dawh lo tuk ve ka ti hnikmi cu a vun ten khenh ai ko.

" Hehe….ziah, nangmah ve lo bang hika zawn kan hmuh cu hehe.. nungak hlah he maw nan i vei " Ka hmai a sen. Umtu tthut zia a ka thiamter lo.

" Aishii! Dai ko tuah! Na tthut ahcun dai tein tthu ko tuah. Mah hmanh ngaihchiat lakah"

" Aa.. hawidang kan ngaihchiat ahcun mi um lonak ah pei kan um cu. Nang ngai aa… mi tamnak ah na ngaihchiatnak cu na rak i phorhlaw ti  …haha"

" Aaa…..dai ko tuah! Heishii…" Ka ai puan a theih caah si men lai. A lung siarem ve lo.

" Aw ee, ka ngaithiam ko khah!"

" Um! Poi lo. Ziah nangmah lawng?"

" Aw, keimah lawng ka si lo ah mah vialte ka darling hna kha maw ka rak i ken hna lai?" Mah fa he bia chim cu a har ko.

" Kan capo lo e Olivia."

           

            Ticun a lung chuak paoh a vun ka chimh i ka lungretheihnak cu tlawmpal a vun zor pah. Ka hnathlam ah, tu ka umnak hi hmaikum ah Pathian nih dam tein ka chia sehlaw tu bantukin ka tthu kho ti hnga maw? Hawile he nuam tein ka tlawng leng kho ti hnga maw? timi ruahnak cu an lo kho hrim ti lo. Kan pahnih in kan dai. Pawngkam tthu mi cheukhat zong an chuak thluahmah khin

" Ella, chim ding kan ngei"

" Zeidah si, capo maw? "

“ Si lo. A taktak”

" Si tak ma "

" Aw henta, Cun pakhat tein kan hal ta lai mu”

" Aw…"

" Angun kha na duh ko lomei?" Eih ka thin. A thei rua lo tiah ka ruahmi. Ziah zeitindah a theih hnga? Ka lung a pit. Ka thinphan pah khin ka ning a zak. Ka hmai a sen.

" Ruat len ti duh hlah. Mu, nang cu kan komh tuk caah kan chim ko lai. " ' aw ' tiphun khin ka lu ka suk piak.

" Angun kha First semester khar ah va a ngei cang.”

" Hnga…!"

" Na hawile pawl nih chim duh hlah tiah an ka ti len ko nain ka lung siarem lo caah kan chimhmi a si."  Ka zoh! A mit hmai ah, hlen veihnak a tel lo. Nain ka zum kho rih lo.

" Na ka zum lo rih lo ma Ella. Biatak dahkaw kan chim. Amah zong nih na duh kha a theih ko nain a sinah na rak chimh bal lo hen cu." Chim ding bia hna na tlau. Hmaikhah loin chitkhat aw vun ti ding hmanh khi ka kawl len nain ka hmu kho lo. Ka thawpi lawng ka chuah khawh fang.

" A dang chim ding na ngeih lo sicun kei class ka ngei rih. Kan chuah tak rih lai. Chunttha."  A bia vun leh ding ka harh ngai. Va a ngeihnak konglam hna vun hlat ding asinain ka hal ngam ti lo. A hmai ah a piang. Bia dang hun ka hal ti hlahseh timi a lang, ka caah fahnak lawngte a tang ko kha a ka zangfah caah a si lai.

            Chun ni a lin ngai. Cu chinchap ah thinlung mei alh bang tuar a harmi hi kekkuai an timi cu maw a si hnga? A si ahcun ka sinah a voikhatnak a vun ka tlak ve.  Tuar a har hrinhran ko dah. Ahram thok i ka rak duh lio caan i amah hmuh duh ah buti dawr ah ka kal caan hna ka mitthlam ah a hun cuang. Ka ngai. Ka hlam ka hmaika ah. Zalong tein a nih lio caan hna voi tein hmuh ka vun duh rih. Thianghlim tein ka hmai ah zeirel lo ngai in a hun kal caan hna hmuh ka duh rih ko nain caan timi ngai hi mu. Maw caan, na min hi a zei sullam dah si?

            Chankhat ah voikhat, Kalay University ah  nuam thlaimai in kan tlongleng kan tti kan ti nain mu kei ka caah ah cun ahar hrinhran ko rua dah. Na hnu lei in nangmah hmuh duh ah thintut lungtur in nan tthut tawnnak buti dawr ah phaisa ngeih lo zong ka rak in bih caan kha a nuam bik ko ruah dah ka ti. Sau deuh nan tthut ahcun dawr ngeitu hna hmaikhap loin sapherh tamtuk ei sual in leibaa he ka ttin caan hna zong kha nang le kei kar ah philh lo ding thil an rak si. Nain cu zong cu nang nih na rak thei rua lo mu Angun.

            Kei nih cun, second semester ah ka duhnak hi fiang tein kan nun hmanh thap ngam in na sinah ka phuan lai ka ti nain maw caan, mi caah khua a rak ruah ve lo ning hi a fak ai mu. A hlan i, nan rak tthut tawnnak " ~aungzalat Buti Dawr" ah khan kei cu ka tthu ngam ti lai lo. Ka mitthlam le ka sining ah foi le bai in na lo kho hrim lo Angun. Nain, philh khawh kan rak zuam ko lai. Caan kar lak i a zammi minmei cu aho nih dah zungzal in a tlaih kho peng lai. Kan philh hrimhrim lai Angun. Nain ka ngaithiam mu. A dik, biatak a simi ka chunmang hna hitin ruahchannak ngei loin an lo ko ding hi cu ka ruah ah fur ruahti maw a si thei hlah. Nain ka mitpum chungin duhsah tein an hun  luang thluahmah mi mitthli a si cu kei  kai pheh ngam hrim lo Angun.

            Fur caan cu a liam  zau ko lai Angun.

            Cutin,

            Kan duhnak cu a liampi te ko lai ti ruahchanhnak he

Mangttha ai kun mu, Sian lo "Buti Dawr Ah Minute".

                                               

2013 Diary

                                                Ella

                                                June 12.2013

Chungkuh

August 14, 2015

11:32 PM

Kalay

                                  Notes; Thinlung Hmape cauk chungin vun lakmi a si.