Nungak Tlikpi Timh Zaan

                           Nungak Tlikpi Timh Zaan

        

Ka hawipa lungrawh cu a hawile nih kan tuarpi cio. Kan ruah ah kan celh cio lo. Cu bantuk nule pa cu tiah a zai na, an mit a sang tuk deuh tiah a ti na tiin kan um. Kan lungre a thei. Ka hawipa cu ka celh ti lo, tiah a hmai ah a hunhmi a senci ‘kuak’ tiah a hun cauh! A hlan i cheer kan rak ti tawnmi zong tuzaan cu a ti ngam hrim ti lo. A ho poah kan lung a rawk, a kek kuai kan ti lai cu.
 Sau nawn kan hun thu cang hna, kan dai dih. Aho hmanh a holh ngam kan um lo, a ruang cu tuzaan kan hawipa a nungak he an ttian zaan a si. A lungrawh cu kanmah tiang a kan chonh dih. Zei ruang ahdah an in then, an tian?

Nu a nule pa nih kan hawipa cu an fanu caah an lung a tling lo, mi dang he pehtlaihter(pe-sa) an timh cang hna. Amah nakin a thiamsang le a fim, pasal tha an um ko tiah an ti. A dawtmi zong cu fanu fangkhat te cu sikaw, nule pa bia al ngam loin a lu a khun ve ai ko. Cu tikah a hawile kan za tein kan lung a rawk. Zaan a hun tlai thluahmah cang, a cheu cu kan lu a rit ngai cang. Nain, kan hawipa cu ruahnak ngan pipi ngei dawh in a khahmul moi pah in a ngang ko.

“ Ka tlik pi lai!” Kan lau, kan sam aa tlir. Kan fim dih citcet! ( A senci, a power a zor)
“ Aa.. tha lai ma?” tiah kan hawipa nih a hun ti.
“ Ka tlikpi lo ahcun zeidah ka tuah khawh ti lai? Hitin ttah peng ding cun zeisan hmanh a tlai lo. Amah zong nih ka dawt bantuk in a ka dawt ve ko. Ka tlikpi ko lai.”
“ Tha tein ruat than ko tuah, nangmah he umti dingin ta nan rak chim bal cang ma?” tiin a hun hal chap. Chitkhat cu a dai. Aw si tak tiphun khin kan za tein kan dai.
“ Kan rak chim bal lo nain, zei thil paoh tlung sehlaw nangmah hnu ah ka dir peng lai. Na hnu kan zulh lai i kan tuar tti lai a ti ko. Ka tlik pi ko lai, ka siang bak lo. Amah lo cun ka si kho lai lo” tiah a hun ti ko. A si kho lai lo. I ruat than rih ko tuah kan ti ko nain kan chim kho ti lo.
“ A poi lo. Nan ka zulh duh lo zong a tha ko. Ka hawikom tiin kan ruah hna i nain nan rak si lo. Mahtluk hawi lungre theih ah a nuamhnak ding caah tuah khawh komi thil tuahpi piak duh lo cu, a poi lo. Keimah lawngin ka tlik pi ko lai. A herh hrim kan herh hna lo nan thei ma?” tiah kutdong sawh pah in cabuai cu fak takin a hun cumh. A bia cu kan al kho ti hrim lo. Al awk zong a tha ti lo. Ticun, kan hawile he nupi tlikpi dingin therphannak he kar khat hnu kar khat in…. nungak inn ah.

Dipa thla cu sikaw, Hakha khua a kih he cun a kaih lo ngai. Kan hawipa cu kan chon ngam ti hrim lo. A cheu nih thinphannak he a tha lai maw, zeitin a si hnga? Cun, khoika lei dah kan um lai. Hei tlikpi kho hna usihlaw buaibai nak a um hnga maw? A thaizing lei ta zeitin kan tuah lai tiah lungretheih he kan um. Cu lio ah, ruah lo piin
“ Ka dua le, ….” tiah kan hawipa nih a hun kan ti. A holh lai kan tih taktak. Zei kong dah a chim hoi cang hnga tiah kan let ngam lo. Chitkhat mitthep pah lawng khin kan hei bih.
“ Nupi tlikpi hi nupi fir he a lo nan ti maw?” tiah a kan hal ko. Kan ar. Holh awk kan thei lo. Kan hawipa nih
“ Kawi, ma cu zei ruangah”
“ Ka dua le, atu ka thil ti hi a dik rua lo tiah ka ruah.”
“ Ziah, a hman ko. Nain, pakhat a ummi cu zeihmanh timhtuahnak ngei loin…” tiah ka hun leh lio ah ka bia a dong rih lo
“ Si lo. Mahkha ka chim duhmi a si lo. Tu tlikpi dingin ka ruahmi hi keimah kap lawngin ka ruahmi ka lawhter. A ruang cu, amah he tha tein chimti le bia i ruahti ta loin hitin keimah lawngin ka chimmi hi ka palh ko rua ka ti.” Kan dai. A ke kar a hun din.
“ Ka ruah ah ka palh ko rua ka ti. A ruang cu, nu cu chankhat min pakhat lawng an ngei. Limhang timi ah cuaithlainak hi nu caah cun an fimnak le an chawva in hun cuai than awk a tha ti lo tiah ka ruah. Tu ka ruahning bantuk in amah zong nih ka bia al ngam loin hun ka zul ve sehlaw mi nih zeitindah a hnu in an chim rel hnga? Cun, atu bantuk duhnak cu a mitcaw timi ruahnak he ka thil timhmi hi ka palh hrim ko rua hawile.”
Kan dai ko. Nu an inn kan phan deng, lamkuaih pakhat lawng ai duh cang. Lampawng ah kan dir hna. A hohmanh kan holh lo, a chimmi cungah kan lung a tling pah phun khin. Culio ah,
“ Sicun, zeitindah na ruah than ning a si? Tlikpi than lo dingin maw? Tlikpi than lo ding asi cun mi vaal dang kutsin ah a liam ding cu na zoh kho taktak lai ma?” tiah kan hawipa nih a hun ti. A si tak, hitluk a duh ko ah a thlah siang taktak hnga maw timi ruahnak he kan nih kan dai. Cun, lamkam ah dap tete an hun til ah kan hawipa mithmai ah sianlonak le ngaihchiatnak he ai cawhmi dapti maw asiloah lungchung mitthli dah an hun tolh ziahmah ve.
“ Mi vaal dang kut ah a liam ding cun ka ruat kho lai lo. Nain, nu a sinak ka rak ruahpiak lomi kha ka palh hrim ko. A ruang cu kan rak i duh dawt lio in khan hi bantuk thil a si ding cu kan rak ruah lo hmanh ah kanmah caah biatak tein kan rak ceihti bal lo. Hmailei kong a chim caan ah, kei cu zei ah ka rak rel lo. Cucaah, a sinah ngaihthiam ka hal lai”
“ Ticun, ngaihthiam hal dingin cun amah nih kan duh ti lo an timi a si tung lo. Tu cu, a nule pa nih pei an in then hna a si hi kawi” tiah sum khawh loin ka hun ti.
“ A si ko. Ka chim bang khan, an mah kha upat ( man ngeihter/sunlawiter) vo pek an hau. Cucu keimah lei in zeitik hmanh ah ka rak pe bal lo. Cutik ah amah le chungkhar nu nih an ruah ding mi cu kan fanu hi a mah a dawt bantuk in a dawt tung lo. Hi bantuk nih hin zeitindah innchungkhar a sersiam kho hnga? Dawtnak timi hi i tlaichanhnak lawng a si lo. Pekchannak le caan pek khawh le cu caan cu sunglawi tein hmanti khawh hi a si tiah ka ruah. Cucaah, tu ka sining hi tuak ah cun a nule pa nih keimah sinin an i ruahchan ding a um lo bantukin a ttih in an ka tih lai dah.” A bia cu a hun i din. Tlawmpal ka lung ah a hun lutmi cu a senci a bia thawt lio maw a si maw a lungchung bia hen dah ti phun khin ka um nain a aw nih fiang put in a senci a si lo cu a hun langhter. Cun,
“ Tu ahhin, pakhat le pakhat kan i duh dawtmi hi sullam cu a dang cio. Hika zawn ah hawile hna tuzaan ah ka fiang. Cucu pakhat le pakhat kan rak i duh dawtmi hi chungkhar tling(tak) tak kan rak ser hlan ah pakhat le pakhat lungput le a si rih lomi chungkhar ah a hme tein kan rak ser chung ti hi a si. Cun, kan rak i duh dawtmi hi zei ruangah dah a si? Minung kan si ruangah maw? Nain, tuzaan ka ruahmi cu kan rak i duh dawtmi hi a nuammi chungkhar le nuamhnak timi sullam hi kan sinah a phak khawh nakhnga a si ko lo maw tiah. Cun, nupi tlikpi timi hi fir a si timi kan theih ko nain fir ah kan rak ruah lomi thil pakhat a si. Cucaah, fir cu ka duh lo bang tuzaan nupi tlikpi ding ka timi zong hi ka let than. Kan duh dawtmi taktak cu tlikpi(fir) ding cu ka siang bak than ti lo. Tha tein, a nule pa sinah khukbil in le phungphai ningin ka hal hna. Cutin an hnatlak lo sicun Pathian nih kan caah a sermi lam a dang i a si caah caan sinah le mahle tawk tein kaa lungsi ko lai. An ka cohlan sicun Pathian sinah le Mipi hmai ah ka dawtmi cu ka dawtnak hna cu biakamhnak ka tuah lai. Cucu a hmanmi ka dawtnak zong a si.”
“ Ehem! Ehem!” tiah rual tein khuh-khuh thawng a hun ril. Ka ni maw theih hlah, nain a fiang mi cu dawtmi ngeih lo hi cu aw… tiah kan lungkil ah fak ngai in a hun kan suk cio lai dah.
“ Khah! Kawi le hna ka lawm. Tuzaan ah ka lung a pem. Nan cungah kaa lawm tuk. Tuzaan nupi tlikpi cu kai let than cang.” tiah tlang-au phun khin a hun kan au hnawh. Kan tha a zaang, kan lung a ritmi hna a zor dih. Nain, pakhat cu amah bantukin duhnak ah a ral tha i dawtmi ngeihmi pakhat hmanh kan um lo caah a sinah kan hmai a hngal ngam lo.
Ticun,…............!!!!


Theihternak: A sau pah caah sawri. Mah ruahnak tialmi a si. Mah tiang khan cun an i thit-um maw ti kha cu nangmah tein tuak dingin biahalnak kan tuah chih.

Upatnak he,
Salai Van Bawi Mang